Напярэдадні калядных святаў вучні СШ № 1 г. Лагойска далучыліся да міжнароднага дабрачыннага праекта "Новае жыццё ў абмен на крышачкі".
Дзеці з 2 "Б" класа пад кіраўніцтвам педагогаў Ганны Меркуль і Алены Комлевай сабралі некалькі пакетаў з пластыкавымі крышачкамі, якія 24 снежня перадалі Паўлу Алімаву, аўтаваланцёру, што займаецца зборам, захаваннем і транспарціроўкай крышачак у Лагойскім раёне.
Праект "Новае жыццё ў абмен на крышачкі" дапамагае дзеткам з рознымі захворваннямі. Сабраная другасная сыравіна адпраўляецца на пераапрацоўку, а сродкі, атрыманыя ў выніку, ідуць на лячэнне дзяцей.
Наш горад восенню прыняў удзел у рэспубліканскім экатуры, арганізаваным пры інфармацыйнай і фінансавай падтрымцы кампаніі "Coca-Cola ў Беларусі". З 25 кастрычніка па 6 лістапада спецыяльны аўтамабіль наведаў 50 населеных пунктаў краіны і сабраў 15 тон пластмасавых крышачак.
У Мінскай вобласці лідарамі па масе пераданых на карысць праекта крышачак сталі жыхары Салігорска і Барысава. Сярод абласцей больш за ўсё іх сабралі на Брэстчыне.
Сродкі, атрыманыя ў выніку пераапрацоўкі сыравіны, будуць накіраваны на дапамогу дзецям з цяжкімі хваробамі нервовай, костна-мышачнай сістэм і іншымі праблемамі са здароўем з Мінскага, Рэчыцкага раёнаў і Бабруйска.
А праект працягвае працу далей. Далучацца да яго могуць усе, хто нераўнадушны да чужой бяды, у тым ліку арганізацыі і прадпрыемствы раёна.
Крышачкі ад бутэлек можна прыносіць у пункты збору, якія размешчаны ў рэдакцыі газеты "Родны край" па вуліцы Савецкай, 1а (тэл. 78-1-53), а таксама ў магазін "Планета инструментов" па вуліцы Перамогі, 86.
Разам мы зробім гэты свет хоць крыху лепшым!
Алена Масцерава.