На акцыю «Чысты лес» запрашаюць усіх жадаючых 9 кастрычніка. Яна традыцыйна праходзіць у Беларусі па ініцыятыве Міністэрства лясной гаспадаркі і ахоплівае ўсе рэгіёны краіны.
У суботу ва ўсіх 11 лясніцтвах Лагойскага раёна любы жыхар з 8.00 зможа атрымаць пакеты для збору смецця. Для яго вывазу будзе арганізаваны транспарт. Працы па навядзенні парадку пройдуць каля мемарыяльных комплексаў, вакол усіх сельскіх населеных пунктаў, райцэнтра.
Як адзначылі ў Лагойскім лясгасе, у мінулым годзе ў акцыі «Чысты лес» паўдзельнічалі 39 тыс. чалавек. У выніку працы валанцёраў і работнікаў лясной гаспадаркі было прыбрана каля 4,5 тыс. м3 смецця, наведзены парадак уздоўж прыдарожных палос, тэрыторый каля мемарыяльных комплексаў і памятных знакаў. Таксама было высаджана больш за 1,3 млн дрэў.
Алена Масцерава.