На старонках нашай газеты мы распавядалі аб тым, што гэтая вучаніца 10 класа Астрошыцкай СШ атрымала дыплом 3-й ступені на абласным туры  алімпіяды па беларускай мове і літаратуры.

І вось, як паведамілі нам з гэтай навучальнай установы, дзяўчынка зноў парадава ўсіх перамогай.  Пры падтрымцы настаўніцы беларускай мовы і літаратуры Іны Бельскай яна стала пераможцам  Мінскага гарадскога конкурсу “Славянскі калейдаскоп” і  атрымала дыплом першай ступені.

Конкурс праводзіўся сярод маладых літаратаў Беларусі і Расіі і прысвячаўся Дню яднання нашых народаў і 80-годдзю Перамогі ў Вялікай Айчыннай вайне.

Урачыстае ўзнагароджанне прайшло ў Саюзе пісьменнікаў Беларусі менвіта сёння, у дзень свята.

У зале, дзе знаходзяцца партрэты пісьменнікаў, якія змагаліся за Радзіму, Міхась Пазнякоў і Уладзімір Мазго павіншавалі нашу зямлячку, уручылі ёй дыплом, грашовую ўзнагароду і памятныя падарункі.

Дзяўчынка была, вядома ж, узрушана такой запамінальнай падзеяй.  А перамогу Ганне Чур прынесла работа “Памятаць, каб жыць”  у намінацыі “Малая проза”. У ёй школьніца распавядала пра тое, як разам з сябрамі яны захоўваюць памяць пра вайну і  гатовы зрабіць усё для захавання міру на нашай зямлі.

Валянціна КОРЗУН.