У Плешчаніцкую дзіцячую школу мастацтваў 8 красавіка прыедзе з канцэртам беларускі піяніст, арганіст, народны артыст Беларусі Ігар Алоўнікаў. Выступленне пройдзе ў 15.00.

На канцэрт-фестываль вучняў харэаграфічнага класа школа мастацтваў гарадскога пасёлка запрашае 12 красавіка. У рамках Дзён адчыненых дзвярэй 22 – 23 красавіка тут адбудуцца канцэрты-прэзентацыі для школьнікаў, а 26-га – канцэрт-фестываль вучняў класа фартэпіяна.

Лагойская дзіцячая школа мастацтваў запрашае гледачоў на справаздачныя канцэрты, якія пройдуць 8 і 10 красавіка ў 17.30. А 12 красавіка ў 15.00 на базе Гасцілавіцкага сельскага дома культуры вучні 7-га тэатральнага класа пакажуць выпускны спектакль «Чучело» па аднайменнай аповесці пісьменніка Уладзіміра Жалезнікава.

Справаздачны канцэрт пад назвай «Мы в объективе» анансавала тэатральная студыя «Маскарад» Лагойскага раённага цэнтра культуры. Паглядзець, чаму навучыліся юныя тэатаралы, можна будзе 16 красавіка ў 18.00.

Цырк «Авацыя» прадставіць у Лагойскім РЦК насычаную праграму «Чудо» з удзелам эквілібрыстаў, акрабатаў, паветраных гімнастаў, фокуснікаў-ілюзіяністаў і г.д. Прадстаўленне адбудзецца 9 красавіка ў 18.00.

А 25 красавіка ў 14.00 на гэтай жа сцэне плануецца выступленне акцёраў Мінскага абласнога драматычнага тэатра з добрай, светлай казкай пра дружбу, дабрыню і смеласць «Инопланетенок». Спектакль у гэты дзень пакажуць і ў Плешчаніцкім цэнтры культуры, толькі ў 18.00.

У Лагойскім гісторыка-краязнаўчым музеі імя К. і Я. Тышкевічаў да 15 красавіка праходзіць выстава аўтарскіх лялек Кацярыны Тарасенка, а з 17 красавіка па 3 мая тут плануецца выстава вырабаў з саломкі Валянціны Паздняковай і выцінанкі Вікторыі Бародзіч.

Алена Масцерава.